Тропарь святителя Льва, папы Римского
глас 8
Православия наставниче,/ благочестия учителю и чистоты,/ вселенныя светильниче, архиереев Богодухновенное удобрение,/ Льве премудре,/ ученьми твоими вся просветил еси, цевнице духовная./ Моли Христа Бога спастися душам нашим.

Тропарь священномученика Ермогена
глас 4
Российския земли первопрестольниче/ и неусыпный о ней к Богу молитвенниче,/ за веру Христову и паству твою душу свою положив,/ страну нашу от нечестия избавил еси./ Темже вопием ти:/ спасай нас молитвами твоими,// священномучениче Ермогене, отче наш

Кондак мучеников
глас 4
Мучением страшным предлежащим,/ Господни страдальцы доблии/ в небоязненном радующеся мудровании,/ сим собеседоваша, о плоти нерадивше,/ темже наследствоваша вечнующую славу,/ о нас молящеся присно,// восхваляющих их подвиги.

Кондак апостола Онисима
глас 4
Яко луча, возсиял еси вселенней,/ зарями сияя солнца, блаженне,/ всесветлаго Павла, мир просветившаго:/ темже тя почитаем,// Онисиме славне

Тропарь равноапостольных Мефодия и Кирилла
глас 4
Яко апостолом единонравнии/ и словенских стран учителие,/ Кирилле и Мефодие богомудрии,/ Владыку всех молите,/ вся языки словенския утвердити в Православии и единомыслии,// умирити мир и спасти души наша.

Тропарь преподобного Мартиниана Палестинского
глас 8
Пламень искушений слез теченьми погасил еси, блаженне,/ и, морская волнения, и зверей стремления обуздавый, взывал еси:/ препрославлен еси, Всесильне, огня и бури спасый мя.

Тропарь Божией Матери пред иконой Ее Иверской
глас 1
От святыя иконы Твоея,/ о Владычице Богородице,/ исцеления и цельбы подаются обильно/ с верою и любовию приходящим к ней./ Тако и мою немощь посети/ и душу мою помилуй, Благая,// и тело исцели благодатию Твоею, Пречистая.

Тропарь священномученика Власия
глас 4
И нравом причастник,/ и престолом наместник апостолом быв,/ деяния обрел еси, Богодохновенне,/ в видения восход,/ сего ради слово истины исправляя,/ и веры ради пострадал еси даже до крове,/ священномучениче Власие./ Моли Христа Бога/ спастися душам нашим.

Тропарь священномученика Харалампия
глас 4
Яко столп избранный Церкве Христовой/ и светильник присносветлый всея вселенныя,/ премудре показася, Харалампие,/ возсия в мире мучением,/ разруши идольское мракобесие, блаженне,/ сего ради явися предстатель Христу,/ молися спастися нам.

Ин тропарь святителя Тихона, патриарха Московского и всея Руси
глас 3
В годину тяжкую Богом избранный / в совершенной святости и любви Бога прославил еси, / во смирении величие, в простоте и кротости силу Божию являя, / положил душу за Церковь, за люди своя, / исповедниче патриарше святе Тихоне, / моли Христа Бога, / Емуже сораспялся еси, / и ныне спасти землю Русскую и паству Твою.