Правило веры и образ кротости,/ воздержания учителя/ яви тя стаду твоему,/ яже вещей истина,/ сего ради стяжал еси смирением высокая,/ нищетою богатая./ Отче Вуколе,/ моли Христа Бога,/ спастися душам нашим.

Агница Твоя, Иисусе, Агафия,/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся Крещению Твоему,/ и стражду Тебе ради, яко да царствую в Тебе,/ и умираю за Тя, да и живу с Тобою,/ но, яко жертву непорочную, приими мя, с любовию пожершуюся Тебе./ Тоя молитвами, яко Милостив, спаси души наша.

В тебе, отче, известно спасеся еже по образу:/ приим бо крест, последовал еси Христу/ и, дея, учил еси презирати убо плоть, преходит бо/ прилежати же о души, вещи безсмертней:/ темже и со Ангелы срадуется, преподобне Исидоре, дух твой.

Симеон старец днесь веселится,/ восприят на руку свою Младенца Превечнаго Бога,/ от уз плоти разрешитися прося/ и вопия: видеста очи мои// спасение Твое мирови

Радуйся, Благодатная Богородице Дево, из Тебе бо возсия Солнце Правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение.

Мученик Твой, Господи, Трифон,/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Фреска. Церковь Христа Пантократора. Дечани. Косово. Сербия. Около 1350 года.

Яко апостолов единонравнии/ и вселенныя учителие,/ Владыку всех молите/ мир вселенней даровати// и душам нашим велию милость.

И нравом причастник,/ и престолом наместник апостолом быв,/ деяние обрел еси, Богодохновенне,/ в видения восход,/ сего ради слово истины исправляя,/ и веры ради пострадал еси даже до крове,/ священномучениче Игнатие./ Моли Христа Бога/ спастися душам нашим.

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Ефреме, отче наш, / моли Христа Бога спастися душам нашим.